咱是臺灣人，
來惜臺語文，
讀（tha̍k）臺語的聲氣，
讀（tho̍k）臺文的雅媠，
聽女性平凡的故事，感受自然自在的溫婉智慧，
看你我拍拚的形影，享受有情有愛的生活趣味，
寫練輕鬆的克漏字，穩固正港正範的臺語底蒂。
 
資深多才情的臺語人、本土語言傑出貢獻獎得主王秀容，精選十外冬的散文創作佮近期新作，配古錐、趣味有意境的插畫，集做這本臺語有聲散文集《咱來讀讀》。伊用柔情貼心的健筆，書寫女性的心思；用深刻關懷的目神，記錄你我的生活；用溫婉靜美的喉音，細說世間的悲喜。伊斟酌的筆力，豐沛的感情，入耳的聲音，誠心開講家己的人生，嘛咧破讀逐家的動靜。伊用輕鬆、親切、有文學味、媠閣趣味的臺語佮哲理，予咱有迎接未來的精神佮勇氣。
 
本冊閣有附三項寶貝：精彩的圖典、素養互動的提問佮45篇克漏字聽寫學習單。會使下載，配合逐篇的有聲朗讀多元運用，是文學欣賞、教學補充、認證準備、寫作訓練上蓋實用的寶典。
 
【本冊特色】
教育部臺語推薦用字書寫，輕鬆「千字文」，附詞語註解，學臺語真簡單。
讀讀第一寶：作者獻聲全冊朗讀，逐篇附QRcode隨掃隨聽。
讀讀第二寶：配合十二年國民教育素養教學，文後附幾條開放式問題，適合大人囡仔問答思考。
讀讀第三寶：逐篇附「臺語小事典」延伸補充佮文章有關的語詞，線條簡單的插畫，提升閱讀趣味性，增加師生自我對話。
隨冊附45篇克漏字聽寫學習單檔案下載連結，讀者會當家己調整朗讀音速練習台語漢字。準備認證、教學補充、訓練寫作大幫贊。